Ein rotspissamputasjon er eit kirurgisk inngrep der om lag 3–5 millimeter av rotspissen vert fjerna. For å få tilgang til rotspissen må ein brette tannkjøtet til sides og bore vekk naudsynt kjevebein. Inngrepet skjer med lokalbedøving og er smertefritt. Etter inngrepet set ein nokre sting for å lukke såret. Stinga vert normalt fjerna etter om lag ei veke.

Når bedøvinga går ut (etter tre–fire timar), kan det kome smerter i området. Difor vil du få smertestillande tablettar eller resept på smertestillande tablettar med deg. 

Det er tilrådd å ta det med ro den første tida etter inngrepet. Unngå difor hardt fysisk arbeid, trening og liknande i denne perioden.

For å vurdere om rotspissamputasjonen var vellukka, må ein kontrollere tanna både klinisk og med røntgenbilete. Dersom det ikkje er symptom i området, vil ein vanlegvis ta den første kontrollen 6–12 månadar etter at såret har grodd.

I samband med alle kirurgiske inngrep er det ein risiko for komplikasjonar. Døme på dette kan vere forlengd blødingstid eller utvikling av infeksjon i operasjonsområdet. Det oppstår likevel sjeldan komplikasjonar i samband med rotspissamputasjon. Ta kontakt med tannlegen for naudsynt behandling viss noko unormalt oppstår etter inngrepet.

For å gjere inngrepet så trygt som mogleg er det òg viktig med oppdaterte helseopplysingar. Ver venleg å gje beskjed om

• medisinbruk
• sjukdomar
• allergiar
• unormal blødingstendens
• tidlegare komplikasjonar i samband med tannbehandling 
• graviditet
• angst for tannbehandling